عشمان فيكي يا أمي الطاهرة..

يا عدرا..عشمان فيكي يا حبيبتي يا أمي الطاهرة..
تسمحي لي يا أمي أتكلّم معاكي شوية؟!
أنا بحبك.. إنتي أغلى إنسانة في قلبي..
شايف فيكي جمال يفوق الوصف..
جمالك جمال روحاني مالوش مثيل..
قلبك صافي.. عينيكي وديعة..
إنتي شفافة.. لابسة الطهارة.
لسانك ساكت لكن قلبك بيتكلّم في جلال الصمت..
أذناكي لم تسمعا إلاَّ صوت الملاك..
يا بختك!!
فلم تسمعي شيئًا يلوث نقاوتك.
مين أصحابك؟
غبريال رئيس الملائكة؟!
أليصابات البارة وزوجها الكاهن؟!
بتقرأي إيه؟ مشغولة بإيه؟
وقتك كنتي بتقضيه إزاي؟
كلام إلهك حبيبك؟ بس؟! يا بختك!!
كنتي بتتكلمي مع مين؟ الملائكة؟ بس؟! يا بختك..
عشمان فيكي يا حبيبتي يا أمي الطاهرة..
يا حبيبتي يا عدرا ممكن تقبلي تتكلّمي معايا؟
صحيح أنا إنسان رديء وأنت كُلك طاهر..
لكن إنتي متضعة..
ورضيتي تلدي ابنك وإلهك في مكان حقير..
إنتي إللي بتعطي للمكان قيمة وطهارة وليس العكس..
تعالي نتصاحب عشان ترفعيني..
أصحاب كتير أخذوني لتحت.. ممكن أنتي ترفعيني؟
ترفعي أفكاري واتجاهاتي ومشاعري وعواطفي..
ممكن ألزق فيكي عشان ألتقط منكي جمالك الروحاني؟
عشمان فيكي يا حبيبتي يا أمي الطاهرة..
ممكن تسهري جانبي عشان ما أغلطش؟
ممكن تطبطبي عليَّ عشان أنام يا أمي الحنونة؟
وأكيد هأنام في طهارة ونقاوة..
ممكن أصحى الصبح أراكي أمامي؟
وأكيد هاعيش يومي في بهجة روحية..
ممكن تيجي معايا مشاويري؟
عشمان فيكي يا حبيبتي يا أمي الطاهرة..
معقول الكلام إللي بأكتبه ده؟!!!!
هل ممكن نكون أصحاب إنتي وأنا يا أمي يا طاهرة؟!
أنا وحش أوي..
لكن فعلاً محتاج حد يصاحبني..
ويرفعني من المزبلة..
ماحدش غيرك ممكن يساعدني..
عشمان فيكي يا حبيبتي يا أمي الطاهرة..
ممكن ما ترفضيش مصاحبتي؟
هاقعد ساكت مش هاتكلم ولن أزعجك..
هألاحظك بس وأشوف بتعملي إيه وأتعلم منك..
يمكن ألتقط منكي المحبة الصافية..
والفرح الروحاني.. والسلام السمائي..
وأشبع بطول بالك..
وأتعلم منكي يا أمي اللطف في الكلام..
آه من وداعتك... آه من قداستك...
آه من طهارتك...آه من نقاوتك...
عشمان فيكي يا حبيبتي يا أمي الطاهرة..
ممكن تعطيني جزء من مليون؟
ابنك غني وأعطاكي كتيييير..
قولي له.. وأكيد هايسمع ليكي..
وأكيد هايعطيني بشفاعاتك..
أنا محتاج لكل فضيلة لأني خربان..
وأثق أن ابنك وإلهك غني وصالح وخيّر..
ولا يرفض لكي طلب..
قولي له ده غلبان وعاري من كل صلاح..
وعايزك تصلحه..
وتملأه فضائل وقيم..
عشمان فيكي يا حبيبتي يا أمي الطاهرة..